பால் கெட்டுப்போகாமல் இருப்பதற்காக தனியார் நிறுவனங்கள் பாலில் இரசாயணம் கலப்பதாகவும், அதன் காரணமாகவே குழந்தைகளுக்கு கேன்சர் உள்ளிட்ட நோய்கள் ஏற்படுவதாகவும், மேலும் பாலில் இரசாயணக் கலப்பு குறித்து சோதனை நடத்தப்படுமென்றும் தமிழக பால்வளத்துறை அமைச்சர் ராஜேந்திர பாலாஜி சில நாட்களுக்கு முன்பாக அதிரடியான கருத்துக்களை கூறியிருந்தார். இந்நிலையில், சிவகாசியில் செய்தியாளர்களைச் சந்தித்த அவர் ''தனியார் நிறுவனங்களின் பாலில் கெமிக்கல் இல்லை என நிரூபித்தால் பதவி விலகத் தயார். ஏன்..தூக்கில் தொங்கவும் கூட தயார். கெமிக்கல் இல்லையென்று அவர்களால் நிரூபிக்க முடியுமா..? நூறு சதவீதம் கெமிக்கல் கலக்கப்பட்டுள்ளது. அது குழந்தைகளின் உயிர் பிரச்னை" என்று தமது கருத்துக்களை தெரிவித்தார்.

ஜிஎஸ்டி எனப்படும் சரக்கு மற்றும் சேவை வரி விதிப்பு முறையானது ஜூலை 1 முதல் அமலுக்கு வரவுள்ள நிலையில், ஜம்மு காஷ்மீர் தலைநகர் ஸ்ரீநகரில்  நடைபெற்ற, நிதி அமைச்சர் அருண் ஜெட்லீ தலைமையிலான  ஜிஎஸ்டி கூட்டத்தொடரில் ஜிஎஸ்டி வரிவிகிதங்கள் இறுதி செய்யப்பட்டிருக்கிறது. அதில், பெண்கள் பயன்படுத்தும் ஸ்டிக்கர் பொட்டு, குங்குமம், வளையல் உள்ளிட்டவற்றிற்கு வரிவிலக்கு அளித்துவிட்டு, மாதவிடாய் காலங்களில் பெண்களுக்கான அத்தியாவசிய தேவையான சானிட்டரி நாப்கின்களுக்கு 15% சதவிகித வரி விதிப்பானது தொடருமென்று முடிவெடுக்கப்பட்டதாக மத்திய நிதியமைச்சகத்தின் சார்பில்  அறிவிக்கப்பட்டுள்ளது.இது, பெண்களிடம் மட்டுமன்றி பொதுமக்களிடையேயும் பலத்த அதிர்வினையும், எதிர்ப்பினையும் ஏற்படுத்தியுள்ளது. இந்தியாவின் கிராமப்பகுதி பெண்கள் மட்டுமன்றி நகரத்து பெண்களும் கூட அதாவது இந்தியாவிலுள்ள  87% பெண்கள் மாதவிடாய் காலங்களில் சானிட்டரி நாப்கினை பயன்படுத்தாமல் ஆரோக்கியத்துக்கு ஒவ்வாத பொருட்களையே பயன்படுத்துவதாக மத்திய அரசின் சுகாதார துறையே அறிவித்துள்ளது. ஆக, தம் தேசத்திலுள்ள பெண்களின் நிலை குறித்தும், அவர்தம் சூழல் குறித்தும் புள்ளிவிவரங்களோடு   சுகாதாரத்துறை வாயிலாக தகவல்களை சேகரித்து வைத்துள்ள மத்திய அரசானது எதனடிப்பையில் இத்தகைய முடிவினை எடுத்தத்தெனும் கேள்வியெழுவதாகவே பொதுமக்கள் தெரிவிக்கின்றனர். மேலும், இயற்கையாக பெண்கள் தம் உடலமைப்பின் பால் உண்டாக்கிடக்கூடிய மாதவிடாய் கால நிலைகளில் பயன்படுத்திடும் நாப்கின்களுக்கு இத்துணை சதவிகித வரி விதிப்பதனால் அவற்றின் விலை உயரத்தானே செய்யும் எனவும், இது எவ்விதத்தில் நியாயம் எனவும் கேள்வியெழுப்புகின்றனர். சமீபத்தில் வெளியான ஆய்வொன்று ''இந்திய துணைக்கண்டத்திலேயே இந்தியாவில் தான் அதிகளவில் பிறந்த குழந்தைகள் இறந்து போவதாக புள்ளிவிவரங்களை வெளியிட்டது'' என்பது குறிப்பிடத்தக்கது.  ஆக, நாட்டில் குழந்தைகள் மற்றும் பெண்களின் நலன்களில் அக்கறை செலுத்தாது வெறுமனே ''தூய்மை இந்தியா'' ''சுவட்ச் பாரத்'' என கூச்சலிடுவதனால் மட்டுமே இங்கேதுவும் மாறிவிடப்போவதில்லை எனவும்,ஆக்கபூர்வமான வழியில் செயல்பட்டு தம் குடிமக்களின் உடல் நலன்களை பாதுகாக்க போதிய வழிகளை ஏற்படுத்தி தருவதே ஓர் அரசின் கடமையாக இருந்திடல் வேண்டுமெனவும் மக்கள் வேண்டுகோள் விடுக்கின்றனர்.

பொது பலசேனா அமைப்பின் தலைமை நிறைவேற்று அதிகாரி டிலாந்த விதானகேயிடம் சிறப்பு பொலிஸ் பிரிவினர் விசாரணை மேற்கொண்டுள்ளனர். பொது பலசேனா அமைப்பிற்கு எதிராக முஸ்லிம் அமைச்சர்கள் மற்றும் அமைப்புக்களினால் தாக்கல் செய்யப்பட்ட முறைப்பாட்டிற்கு அமையவே இவர் இன்று காலை விசாரணைக்கு உட்படுத்தப்பட்டிருந்தார். நாட்டின் பல்வேறு பகுதிகளிலும் முஸ்லிம் மக்களின் மத வழிபாட்டு தலங்கள் மற்றும் வர்த்தக நிலையங்கள் மீது தாக்குதல்கள் மேற்கொள்ளப்பட்டன. அத்துடன் பொலிஸ் அதிகாரிகளின் கடமைகளுக்கு இடையூறு செய்து அச்சுறுத்தல் விடுத்தமை, இனங்களுக்கு இடையில் மோதலை ஏற்படுத்தும் வகையில் உரையாற்றுதல் உள்ளிட்ட சில குற்றச்சாட்டுக்களுக்கு எதிராக பொது பலசேனா அமைப்பின் பொதுச் செயலாளர் கலபொட அத்தே ஞானசார தேருக்கு எதிராக முஸ்லிம் அமைச்சர்கள் மற்றும் அமைப்புக்களினால் பொலிஸ் நிலையத்தில் முறைப்பாடு செய்யப்பட்டிருந்தது. இந்நிலையில் ஞானசார தேரரை கைது செய்வதற்காக விசேட பொலிஸ் குழுக்கள் களத்தில் ஈடுபடுத்தப்பட்டுள்ள நிலையிலேயே பொது பலசேனா அமைப்பின் தலைமை நிறைவேற்று அதிகாரி டிலாந்த விதானகோ சிறப்பு பொலிஸ் பிரிவினரால் விசாரணைக்கு உட்படுத்தப்பட்டிருந்தார். விசாரணைகளின் பின்னர் ஊடகவியலாளர்களுக்கு கருத்து தெரிவித்த பொது பலசேனா அமைப்பின் தலைமை நிறைவேற்று அதிகாரி டிலாந்த விதானகே, பொதுபலசேனா அமைப்பிற்கு எதிராக முன்வைக்கப்பட்டுள்ள குற்றச்சாட்டுக்கள் தொடர்பில் விசாரணைகளை துரிதப்படுத்துமாறு கேட்டுக்கொண்டுள்ளார்.

மத்தியில் பாஜக ஆட்சி அமைத்து மூன்று ஆண்டுகள் நிறைபெற்றுள்ள சூழலில் இன்று, டெல்லியில் செய்தியாளர்களைச் சந்தித்த பாஜக தேசியத் தலைவர் அமித்ஷா "நாடு இதுவரை பார்த்ததிலேயே மிகவும் வலுவானதாகவும் வெளிப்படைத்தன்மை கொண்ட அரசாகவும் நரேந்திர மோடி அரசு உள்ளது. இந்த அரசு மீது ஒரு ஊழல் குற்றச்சாட்டு கூட எழவில்லை எனவும், நாட்டில் உள்ள 125 கோடி பேருக்கும் வேலை வாய்ப்பு அளிப்பது சாத்தியம் இல்லாத ஒன்று என்பதால் வேலைவாய்ப்பில் புதிய வழிகளை உருவாக்கும் முயற்சியில் ஈடுபட்டு கொண்டிருக்கிறோம். சுய வேலைவாய்ப்பை நாங்கள் ஊக்குவித்துள்ளோம். 8 கோடி பேருக்கு சுயவேலைவாய்ப்பை அரசு உருவாக்கி கொடுத்துள்ளது” என்றார்.